ទិដ្ឋភាពរួមនាខួប៦៣ឆ្នាំ ទិវាបុណ្យឯករាជ្យជាតិកម្ពុជា ៩ វិច្ឆិកា ១៩៥៣- ៩ វិច្ឆិកា ២០១៦

ខួប៦៣ឆ្នាំ ទិវាបុណ្យឯករាជ្យជាតិកម្ពុជា ៩ វិច្ឆិកា ១៩៥៣-២០១៦

ដំណើរយាងដល់របស់ព្រះមហាក្សត្រកម្ពុជានាវិមានឯករាជ្យ

ភ្នំពេញ, ព្រះរាជាណាចក្រកម្ពុជា, នាថ្ងៃទី៩ ខែវិច្ឆិកា ឆ្នាំ២០១៦

ព្រះអាទិត្យរះខ្ពស់សន្លឹម ប្រជាពលរដ្ឋក្មេងចាស់ មន្ត្រីរាជការ មន្ត្រីជាន់ខ្ពស់រាជរដ្ឋាភិបាល អង្គទូត រាជទូត​ប្រចាំព្រះរាជាណាចក្រកម្ពុជា បានជួបជុំមូលមីគ្នា នាវិមានឯករាជ្យកម្ពុជាដែលស្ថិតនៅកណ្តាលរាជធានី ភ្នំពេញ។ ម៉ោង៨ព្រឹក ព្រះមហាក្សត្រព្រះបាទបរមនាថ នរោត្តម សីហមុនី ព្រះមហាក្សត្រនៃ ព្រះរាជាណាចក្រកម្ពុជា ទ្រង់ស្តេចយាងដល់ ដោយមានការចាំទទួលបដិសណ្ឋារកិច្ចពីសំណាក់សម្តេចពញាចក្រី ហេង សំរិន និង សម្តេចអគ្គមហាសេនាបតីតេជោ ហ៊ុន សែន ព្រមទាំងមន្ត្រី អ្នកមុខអ្នកការផ្សេងៗទៀត។

មុននឹងចាប់ផ្តើមកម្មវិធីគោរពវិញ្ញាណក្ខន្ឋ និងអុជទៀនជ័យ ព្រះមហាក្សត្រកម្ពុជាបានយាងសម្តែងបដិសណ្ឋារ កិច្ចជាមួយមន្ត្រីជាន់ខ្ពស់រាជរដ្ឋាភិបាល និងអង្គទូត រាជទូតជាដើម។ បន្ទាប់មកព្រះអង្គស្តេចយាងគោរពភ្លេង ជាតិ​ រួចបន្តព្រះរាជដំណើរឡើងលើវិមានឯករាជ្យ ដើម្បីគោរពវិញ្ញាណក្ខន្ឋ និងអុជទៀនជ័យរំលឹកដល់ការទទួល បានឯករាជ្យរបស់កម្ពុជា។ សម្តេចសង្ឃ និងមន្ត្រីសង្ឃថ្នាក់កំពូលៗរបស់ប្រទេសសូត្រធម៌ថ្វាយការគោរព ដល់បុព្វបុរស។

បន្តមកទៀត គឺជាការបង្អោះប៉ោងៗ និងសត្វព្រាបស ដែលតំណាងឲ្សសេចក្តីសុខ និងសន្តិភាព។

ក្រោយចប់ពិធីទាំងនេះ ព្រះមហាក្សត្រ អមដំណើរដោយមេទ័ពកម្ពុជា បានយាងសួរសុខទុក្ខប្រជារាស្ត្រទូទៅ មន្ត្រីរាជការថ្នាក់កណ្តាល និងសិស្សានុសិស្ស ព្រមទាំងកងកម្លាំងប្រដាប់អាវុធគ្រប់ប្រភេទរបស់ ព្រះរាជាណាចក្រកម្ពុជា។ កម្មវិធីបានប្រារព្ឋទៅយ៉ាងរីករាយក្រោមការសារទពីប្រជារាស្ត្រទូទៅ។

ម៉ោងប្រហែលជា៩ព្រឹក កម្មវិធីត្រូវបានបញ្ចប់ ហើយព្រះមហាក្សត្រកម្ពុជា ស្តេចយាងនិវត្តន៍ត្រឡប់ទៅ ព្រះបរមរាជវាំងវិញក្រោមបរិយាកាសយ៉ាងរីករាយ។

តាមទម្លាប់នៃកម្មវិធី ទៀនជ័យត្រូវអុជទុករយៈពេល៣ថ្ងៃ។ ចាប់ផ្តើមនៅថ្ងៃទី៩ ខែវិច្ឆិកា ពេលព្រឹក ហើយនឹង ពន្លត់វិញនៅថ្ងៃទី១១ វេលាម៉ោង ១៥រសៀល ដោយព្រះមហាក្សត្រកម្ពុជា (ឬព្រះរាជតំណាងរបស់ព្រះអង្គ ក្នុងករណីចាំបាច់ណាមួយ)។

ព្រះមហាក្សត្រយាងសួរសុខទុក្ខកងកម្លាំងប្រដាប់អាវុធ

ព្រះរាជាណាចក្រកម្ពុជាទទួលបានឯករាជ្យពេញលេញពីអាណានិគមបារាំងនាថ្ងៃទី៩ ខែវិច្ឆិកា ឆ្នាំ១៩៥៣ (គិតមកដល់ពេលនេះមានរយៈពេល៦៣ឆ្នាំ) ក្រោមព្រះរាជកិច្ចដឹកនាំរបស់ព្រះបាទ នរោត្តម សីហនុ ព្រះបរមរតនកោដ្ឋ។ ដោយសារស្នាព្រហស្ថនេះ ព្រះអង្គត្រូវបានប្រជារាស្រ្តគោរព ស្រលាញ់ និងថ្វាយព្រះនាមថា ជាព្រះបិតាឯករាជ្យជាតិ អធិបតេយ្យ និងបូរណភាពទឹកដីកម្ពុជា។

សូមកូនខ្មែររួមគ្នាថែកម្ពុជាឲ្យបានរីកចម្រើនជាដរាបតទៅ!!!

ដំណើរយាងត្រឡប់វិញរបស់ព្រះមហាក្សត្រកម្ពុជា